Tekstbase - kontekst

Ego vero harum tempore nuptiarum fui in academia Rostochiensi, ut bonis artibus operam darem, ubi multos annos consumpsi.

Hæc soror Ingeborch peperit primogenitum Anno Domini 15............, qui Peter Fynbo ad nomen sui avi denominatus est.

Anno 15............peperit secundum filium, qui Hans vocatus est.

Postea peperit filiam, quam nominarunt Marinam juxta nomen materteræ suæ.

Peperit etiam duos infantes, qui obierunt diem.

Ultimum filium peperit, qui nominatur hodie Ericus.

Anno Domini 1546. me præsente Witebergæ desponsavit pater meus sororem Annam Matthiæ Werckmester. Tunc ægrotavit pater morbo gravi, quo etiam extinctus est. Hic Matthias Werckmester natus est Haderslebii ex honesta familia, inde discedens habitavit Tunderis, ubi duxit uxorem, ex qua 5 liberos protulit. Viduus jam petiit sibi sororem nostram in uxorem dari, quod in nomine Sanctæ Trinitatis factum est. Decubuit pater ægrotus eo tempore ac laboravit per multos annos eadem ægritudine, quam vocant gülden been oder rose.

Anno Domini nostri Jesu Christi 1546. 30. Augusti obiit diem suum Jacob Peterssen Oldendorph, pater meus naturalis ac charissimus, pie et sancte in Christo Jesu suo mediatore. Nam sumpta coena Domini ex manibus Magistri Anthonii, pastoris atque præpositi Haderslebensis, commendavit animam suam Deo Patri per Christum ad æternam vitam et sic placide in Domino Immanuele nostro Christo Jesu obdormivit, qui resuscitabit omnium credentium suorum corpora ad æternæ vitæ gloriam. Amen.

Consulatum gessit annos .. honeste et fideliter, ut omnes cives honorificum testimonium ferunt, quorum multi mentionem ejus cum lachrymis faciunt hodie. Creatus est autem in consulem anno 15.., ut esset collega Henrico Mekelnborch, tunc temporis consuli, cui antea