Tekstbase - kontekst

qvoque salutis. Qvin et patriis legibus, qvoad immotæ perstent, pretium non statuere, audacia est periculosæ aleæ plena. Per Danica autem statuta, qvibus in hac provincia nondum lituram induxit Rex noster Augustissimus et Serenissimus, licet adulteræ, a marito innocente per divortium avulsæ, etiamsj ille sit superstes, post integrum triennium a divortio caste et honeste exactum, δευτερογαμεῖν, sed non nisi dispensante ac indulgente ipso Magistratu summo. Itaque recte censes, Frater exoptatissime, secunda vota concedenda esse foeminæ in literis tuis nominatæ, cujus consortium matrimoniale efflictim ambit urgetque Minister ille Regius Arcis Cronoburgicæ, Severinus Severinj, postqvam illam a junctura prioris maritj avulserat sententia Capitulj Roëschildensis, illaque plusculos post factum divortium annos melioris frugis vitam transegerat, id qvod literæ tuæ viros fide dignos luculenta scriptione testarj testantur. Nullus ambigo, qvin Tu clementissimam Regiæ Majestatis permissionem ad tenorem legum nostrarum matrimonialium aut impetraveris aut, prout facile potes, impetrare velis. Literis, qvas hisce adjunxj, impero Domino Joannj, Paroeciæ Biornekullensis Pastorj, ut virum et foeminam, literis tuis commendatos, matrimonialj copula jungat, ubj tuam de annuente Regiæ Majestatis voluntate scriptam testificationem viderit. Isthæc ex dictamine tenuis scientiæ sed teneræ conscientiæ, inter concatenatas alias occupationes, ad literas tuas, hodie redditas, sine mora respondere voluj, cum ut petitioni tuæ, qva cunctatio omnis præciditur, tum ut optatæ rescribendj occasioni, modo oblatæ, velificarer. Vultus tuj usura vivaque συζητησει tua non minus Ego, qvam Tu mea, fruisci expeto. Vale et Ecclesiæ bono perenna. Dabam cursim. Lundæ Calendis Aprilis Anno MDCLIX.