Tekstbase - kontekst

quos suamet ipsius voce instruxit, docuit, monuit, eos videlicet non discernere judicia hominis sed Dei. Ac propterea ipsis videndum quid agerent in conspectu ejus, qui penes ipsos in causa judicii versabatur. Quocirca dominus Deus præparavit et confirmavit in manu ejus Regnum Israelis. Ezechias religionem a patre Manasse horribiliter deformatam ac superstitionibus contaminatam repurgavit, templum aperuit, verum cultum instauravit, premia doctoribus constituit, Rempublicam rite administravit, et, ut scriptura loquitur, quod bonum erat in conspectu Dei, fecit. <25>

Josias similiter turbavit idola a prædecessoribus in immensum aucta, restituit sacerdotum gradus et officia, coelestisque doctrinæ et publicæ tranquillitatis ac honestatis custos et defensor fuit acerrimus. Quid de pio Asa? Quid de Cyro? Constantino, Theodosio, Carolo Magno, Alphonso? quid de multis Principibus religiosissimis Germaniæ? quid de Regibus Daniæ Christianissimis, Christiano l et 3 Friderico l et 2 qui cum veræ Ecclesiæ viva membra, præclara virtutum simulacra et decora ornamenta generis humani essent, omnes suas cogitationes, consilia, labores et curas, tam belli quam pacis tempore, domi et foris, in fovenda, tuenda et suis exemplis ornanda et locupletanda Ecclesia atque in recte administranda Republica indefesse collocarunt atque impenderunt. Neque unquam per totam vitam a laudabili hoc proposito rerum secundarum illecebris, adulatorum et Empoectarum πιθαvoλoγίαις, variis gloriæ et potentiæ spebus, neque etiam laborum difficultatibus, periculorum magnitudine <26> aut molestiis aliis infinitis, quæ pietatis studium, ut umbra corpus comitari solent, sese abduci patiebantur: Sed in vera Dei agnitione, professione et propagatione gloriæ ipsius atque in civili sua statione rite tuenda et ornanda, ad extremum usque vitæ halitum fortiter perseverantes, propositum pietatis, justitiæ, constantiæ, patientiæ et aliarum virtutum Regiarum mordicus stantes, vigilantes, morientes retinuerunt.