Tekstbase - kontekst

Qvibus de causis, ante annos undecim, vinculum matrimoniale inter Pastorem Dominum Andream Nicolaum ejusque conjugem Ingeburgam consistorialiter solutum sit, ex hac sententiæ copia facile liqvet, qvam cum Reverenda tua Dignitate amice et officiose propterea communico, qvia Minister hujus arcis, Severinus Severinj, veniam et consensum meum unice petit, ut relictam istam uxorem ducere possit, qvemadmodum ab ejus petitoriis simul constat. Qvamvis autem novo conjugio indigna merito censeatur, qvæ ordinationem divinam tam turpiter violaverat, attamen partj reæ novarum nuptiarum potestatem absolute et simpliciter denegare strictj nimis et rigidj juris est, præsertim cum tot annorum spatio veræ poenitentiæ verissima accedant testimonia, cujusmodj a viris fide dignis habet mulier Ingeburg. De hoc casu judicium tuum gravissimum, Venerandissime in Christo frater, qvantocyus expeto, utpote cum pace et indulgentia Reverendæ tuæ Dignitatis horum pastorum unus, vel Dominus Joannes in Biornekul, vel Dominus Nicolaus in Gramestrup, ad humillimum contrahentium votum sacerdotalj benedictione eos copulare permittatur. In Christo Jesu optime et diutissime sospes vale!