Tekstbase - kontekst

Anno 1548., versantibus nobis Lubeci in nuptiis Petri, Nicolaus frater domi habuit rem cum >Margareta ancilla nostra Haderslebii, quæ concipiens peperit primogenitum filium, qui vocatus est juxta nomen patris sui Nicolaus. Natus est hic anno Domini 1549.

Postea peperit ei filiam, quæ nata est anno 15 .. Hæc autem nominata est Catharina ad nomen Catharinæ, sororis nostræ, quæ infans, ut supra commemoratum est, obiit diem suum.

Denuo peperit ei filiolum anno 15.. ............. Hic vocatus est Hans ad nomen fratris nostri Hans Nothi, quem sustulit antea ex Lena concubina; idem vocabatur Hans Holst, qui multis nobilibus servivit. Cæterum ob homicidium nobilis cujusdam, quem interfecit, decollatus est Aalborgii. Ac dicitur tres ante hoc facinus occidisse. Ideoque merito punitus est.

Deinceps peperit Margareta fratri filiolum, qui vocatus est Christianus. Hic natus est Anno Domini 15.. ..........

Consuluit frater mecum de hujus pueri nomine sortiendo. Respondi: Vocetur Christianus juxta nomen Christi, ut testeris ipso nomine et facto te Christianum fieri. Nam hactenus cum illa Margareta impiam et inhonestam vitam egisti. Nunc vero debetis utrimque veram et Christianam poenitentiam agere in hoc, ut alterutrum faciatis, aut cohabitate pie et honeste in contracto matrimonio, aut discedite a vobis invicem et ab ista turpi vita. Meum tamen dedi consilium fratri, ut retineret eandem ac duceret in uxorem, quam ipse stupravit, ut sic tandem pro infamia et ignominia redderet vitiatæ Margaretæ honorem, deinde ut his 4 liberis dignum honorem propter Deum et ejus mandatum exhiberet. Respondit se juxta consilium meum pium et honestum facturum. Proinde duxit eandem Margaretam in legittimam uxorem. Ac dedi eis in subsidium nuptiarum 6 daleros.