Tekstbase - kontekst

coram archiepiscopo de me spargebantur me omnino nesciente. Quibus animadversis volui famam meam defendere contra calumniam ejus. Egi igitur causam meam satis strenue, ut mendacia et calumnias Alexandri ipsa veritate ejusque argumentis confutarem. Et scripsi grave satis scriptum contra Alexandri calumnias, cujus apographon apud me servavi in memoriam. Bis terve archiepiscopum de hac causa allocutus sum, qui respondit se non credidisse in Alexandro tanta mala fuisse. Expecta, inquit, parumper usque dum convocavero aliquos episcopos et doctores, qui audient causam vestram et re conciliabunt vos.

Anno 1550. mense Julio convenerunt aliqui episcopi aliique plures docti viri. Coram his satis morose Alexander et dixit et se gessit, me tacente atque subridente. Archiepiscopus dixit: Quare vos exteri non convenitis inter vos? Ego ad hæc respondi: In me si culpa aliqua justa sit, facta inquisitione vera hujus calumniæ non recuso dignis poenis ac plagis affici. Tunc jussit archiepiscopus illos arbitros debere delibera re ac pronunciare in hac causa. Factis deliberationibus statuerunt causam deferre in reconciliationem. Idcirco illi nos reconciliatos iam voluerunt convivio exhilarare. Rogavit me Alexander ob dimissionem, et ego remisi ex animo non cogitans aliquid de eo mali.

Quid vero Alexander mihi deinde fecerit, judicet Deus, utrum mihi venenum in potu prebuerit, ut solent arcani illi homicidæ ex Gallia oriundi facere. Ego sane valde infirmabar. Petii igitur gratiosam dimissionem a reverendissimo archiepiscopo, qui ægre me dimittere voluit. Stipendium meum postulavi mihi fieri, addidit stipendio meo archiepiscopus xii coronatos Anglicos inquiens: Quare tu a me vis discedere, ego vellem in posterum tibi optime prospicere. Ego: Tuæ magnificentiæ plurimas ago gratias. Cæterum ego valde incipio infirmari, nesciens quid mihi obsit. Deinde Alexander mihi egregie invidet ac utrobique calumniari non cessat. Postremo, domine reverendissime, regnat in hac terra diabolica doctrina Zuinglianorum atque Anabaptistarum aliarumque sectarum.