Tekstbase - kontekst

Aliquot annos oravi Deum per Christum, meum mediatorem, inter alia precationis Christianæ necessaria et hoc, ut daret mihi piam, honestam et castam virginem seu foeminam in meam conjugem. Ac doluit mihi tanto tempore impeditum me esse ab isto benedicto ordine suscipiendo, ideoque Deum graviter offensum esse ob vitam meam non satis pie et honeste juxta verbum Dei transactam. Institui ergo meam invocationem ad solum Deum propter Christum, meum intercessorem, exaudiendam, ac inter sudorem cordis, h.e. lachrymas, addidi in mea precationis confessione hoc de pia uxore donanda: Dato mihi, Domine Deus, propter Christum piam et honestam uxorem; divitias, agros et fundos non peto mihi fieri cum illa, pietatem, honestatem et castitatem ejus solummodo specto. Veniat ergo cito ad me, cujus cor ad me direxeris pie amplectendum et ad salutem amandum.

Anno Domini 1563. 26. Maji venit ad me in carne ra mea, præsente consobrino Nicolao, Catharina, filia Carsten Laurssen, virgo pia et honesta, quæ me longo tempore, inde usque a primo anno functionis sacellaniæ Haderslebensis, arcano sed pio amore amplexerat in corde suo, quod ipsemet nescivi. Ingredientem ad me salutabam inquiens: Quid cupis mihi indicare, mea virgo? Nam meum cor palpitabat, quasi tactum esset hoc verbo mirabiliter mihi sonante: Ecce, tua uxor advenit ad te. Hoc admirabar mihi insculpi in corde et anima, ac cogitavi: Fiat voluntas Dei!