Tekstbase - kontekst

coactus fuerit frater de hac tanta injuria et ignominia conjugii. Cæterum non multum effectum est in hac causa fratris, quippe toto fere biennio abstracta est quasi magna vi uxor ejus legittima ipsi fratri. Quod facinus contumeliosum adversus conjugium a Deo solo institutum pastores Lubecenses in sua ecclesia non debuissent pati nec fieri pertulissent, si vere pii fuissent, verum graviter atque severe in concionibus taxassent et increpassent. Ad hæc ipse senatus seu magistratus debuisset hoc factum impium pernitiosumque impediisse. Non enim licet divortium fieri inter vivos conjuges ob pecuniarium debitum, sed solum adulterium dicit Christus causam divortii esse. Ego propterea themata aliqua de hac alienatione a conjugio composui et ministris ostendi egique insuper causam fratris multoties coram senatu, judicibus et aliis mediatoribus in hac discordia, sed nihil effectum est, cum tamen multum pecuniæ interea frater consumpserit atque jacturam negotiationis suæ non exiguam fecerit.

Me vero in Anglia agente anno 1549. accepit frater scriptum Christiani regis Daniæ atque scriptum Johannis ducis Holzatiæ ad senatum Lubecensem, ut uxorem fratri curarent restitui. Sic tandem recepit abalienatam uxorem frater juxta mandatum humani magistratus et non juxta verbum Dei solum atque mandatum, quod senatus in majori valore ac præstantia debuisset curasse quam humanum scriptum.

Postea reconciliata fratria peperit fratri liberos, quos nominatim infra annotabo, prius tamen paucis de fratriæ parentibus.

Apollonia hæc fratria mea nata est ex parentibus honestis Lubeci anno 15... Pater ejus vocabatur Heine Bremer, qui ex honesta familia Bremis est oriundus; inde discedens venit Lubecum, ubi duxit in uxorem Apolloniam, civem Lubecensem, quæ peperit ei Carsten Bremer atque Henrick Bremer, Annam filiam atque Apolloniam, quæ facta est uxor fratris, cui promisit Bernt Stichan cum