Tekstbase - kontekst

Postea vocato mihi per puerum Boëtius dixit se pro me cum principe contulisse, qui nollet me discedere aliquo. Respondi: Si firmum fidei et amicitiæ fundamentum in te esset erga me, ego dudum accepissem 40 marcas additas, quas etiam princeps libenter concessisset; imo et bonam paroeciam accepissem multo ante, si tu et Hieronimus aliique mei osores in aula ex livore atque malevolentia non impedieritis. Sic experior in ore multorum amicorum mel esse, in corde fel. Sit Deus horum judex!

Anno 1562. 31. Martii vocarunt me in templum Matz Werckmester, Matz Iwerssen, Hans Lassen, Jes Schröder, Peter Schriver, Laurs Schröder, Jurgen Schröder, Clawes Schröder, Simen Goltsmit et Johan Overscherer. Hii rogarunt propter Deum, ut vellem manere annum. Respondi: Cum me propter Deum ita obnixe rogetis, volo ergo usque ad uberiorem sustentationem, si modo denuo legittime vocatus fuero, auxerint stipendium et domum curarint instaurari. Responderunt se hoc facturos. Cras, inquiunt, conveniemus cum tota multitudine, quæ nullo modo me dimittere vellet, etiamsi aliqui coram principe mentiti essent totam rempublicam me nolle recipere, quæ postea cum lachrymis dolorem suum declararunt.

1. Aprilis convenerunt bis in templo 80 viri, primarii cives, consultantes, ut me retinerent atque principi indicarent suum mærorem ob meum abitum; accesserunt 30 viri suadentes supplicem libellum componendum ad principem de me recipiendo denuoque vocando.

2. Aprilis denuo me nesciente plures quam 100 cives, quorum aliqui consulta runt primum magistrum Georgium Boëtium conveniendum esse quam supplicarent principi.

3. Aprilis 4 cives ex jussu totius reipublicæ allocuti sunt Boëtium, qui satis impie ac tyrannice illis respondit. O sanctam amicitiam Boëtii erga me, quam antea toties juramento confirmavit.