Tekstbase - kontekst

Themata 21 Johannis Sasceridis impressa emi Haphniæ. Meas itidem disputationes ac oppositiones alubi conscriptas habeo.

8. Julii misit mihi dono doctor Nicolaus Hemmingius suas propositiones, quas vocat assertiones de operibus charitatis et officio cujusque in sua vocatione. Misi vero Boëtio cætera themata ejus. Eodem 8. Julii publice disputavi quam gravissime cum Hemmingio, qui non satis etiam mihi respondere poterat, ut doctor Knopperus, doctor Lætus, doctor Elias plurimique professores mirarentur Hemmingium ita turbatum vacillare. Disputationis hujus ac oppositionis argumenta et syllogismos alubi habeo.

14. conveni cum vidua quadam nomine Thale ut qualibet septimana 1/2 dalerum pro cibo, potu et cubiculo (15. primum pransus sum ibidem), apud quam hospitatus sum usque 28. Julii. Huic satisfeci grato animo ante discessum meum.

13. Julii mane collocutus sum cum doctore Nicolao Hemmingio in suo pomario, ostendens ei varia testimonia mea. Postea admonui eum modeste ac humiliter de verbis atque sententia sua, quam affirmavit in lectionibus suis unice veram esse: Quod verba Christi in coena sua solummodo ad homines et sumentes spectarent, non ad elementum panis et vini. Hoc, inquam, acutissimum Suinglianorum argumentum est, ut noceant ecclesiæ Christi. Respondit mihi satis morose atque torve. Ego nihil moratus ipsius morositatem atque ἀφιλαγαθίαν dixi ei: Ne pergas ita turbare ecclesiam Dei in hoc regno. Tam acris inter nos fuit disceptatio, ut ipse contra meos syllogismos ex verbis Christi collectos nequiverit verbulum respondere, ut ipsius studiosi habitantes in domo ejus satis mirarentur. Tandem data manu egit mihi gratias pro pia in formatione. Argumenta mea hujus colloquii alubi conscripta reservo. Christus avertat omnem conatum diaboli regatque nos Spiritu Sancto suo, ut in suo puro evangelii textu perseveremus humiles et constantes ad vitam æternam. Amen.