Tekstbase - kontekst

Hac æstate ferunt 40 homines impotes mentis fuisse Haphniæ.

1562. 27. Julii hora 7. in lectione doctoris Erasmi Læti horror mortis invasit cor meum. Postea spirituales tentationes diabolus instillavit, quas Deus repulit juxta meam precationem.

28. Julii denuo coepit me diabolus quam acerrime tentare de prædestinatione et æterna vita, sed superavi eum verbo et promissionibus Christi. Ideoque valedicens hospitæ ac satisfaciens discessi Haphnia salvus venique Roskildium ad domum magistri Petri pastoris. Noctu passus sum varias Sathanæ tentationes, e quibus me Deus liberavit juxta precationes.

30. Julii veni ad monasterium Ringstedt, in via composui cantionem ad Fredericum regem Daniæ. Noctu mirabilem habui extasin de variis rebus et, ut mihi videbatur, sanctis; scripsi aliquid in pariete apud lectum.

1. Augusti veni ad coenobium Zoar ad Martinum lectorem, cui narravi sententiam Hemmingii,quem ipse voluit defendere. Eodem deambulavi in templo legens in græcolatino testamento; serpentem vidi in area, quem statim conculcavi, nec potui eum postea reperire.

2. Augusti veni ad monasterium Andersko, ubi fui in magna extasi noctu. Mane valde infirmus in horto gladium meum fregi. Eodem veni Korsør et in via aliquot daleros amisi.

In Korsør fui valde infirmus; audivi senem illum asinum hr. Jens concionantem, cui tradidi multos daleros et 18 aureos servandos. Quantam fidem mihi in hoc præstiterit, reddat ipse Deo rationem. Nam recepi tantum 12 daleros et 7 aureos, cum multo plures ipsius fidei tradiderim.

Trajeci Mare Balticum non tam graviter infirmus ac veni Neoburgum ad domum domini Laurentii, ubi pernoctavi. Postero die conduxi mihi currum cum famulo meo Andrea per Othoniam usque Assens.

5. Augusti vesperi veni ad domum domini Petri pastoris infirmus; in itene re prope Asoniam tradidit mihi Hans Matzen epistolam magistri Georgii, quæ admonet, ut quam citissime domum redirem.