Tekstbase - kontekst

Accepi antea 12. Julii priorem ejus epistolam sua viva manu scriptam, ut susciperem paroeciam Oxenvat. Rescripsi ei me propter causas illam paroeciam non posse suscipere, rogitans, ut intercederet pro me apud principem, ut hac excusatione esset contentus usque ad meliorem functionem. Itaque princeps fuit contentus, veluti posterior Boëtii epistola refert, quam accepi 5. Augusti.

6. Augusti infirmus transvectus sum usque Aresundt, ubi apud aquas ac littus maris prope domum Jurgen Falssen transvectoris in mea insipientia atque infirmitate exclamavi altissima voce totum regnum Daniæ et Sueciæ puniendum esse bello aliisque calamitatibus et plagis propter contemptum verbi Dei, impoenitentiam ac scelera varii generis.

Ex quo spiritu hæc quasi vaticinando exclamaverim, etsi infirmus mente mea, Deus novit. Arbitror ipsemet tamen ex bono spiritu hæc esse prædicta atque pronunciata, quia eadem mala belli inter regem Daniæ et Sueciæ exorta eventum suum habuerunt postero anno 1563. Deus misereatur nostri et mitiget calamitates ecclesiæ suæ. Amen.

6. Augusti tentationes spirituales me variis modis jam decumbentem Haderslebii in domo fratris mei Nicolai infestarunt.

7. Augusti in morbo meo visitarunt me doctor David Milesius, magister Georgius Boëtius, Anthonius pharmacopola, Hechtius pastor aliique plures pii homines.

8. Augusti graviter ægrotavi, ut omnes de vita mea corporis desperarent.

9. Augusti preces pro me fiebant in ecclesia Christi, quod mihi profecto conduxit ad sanitatem, ut convalescere paulatim inciperem. 10. Augusti ex gratia Dei magis convalui. Sed postero die variis modis tentatus sum; ex his tentationibus Deus me liberavit.

Sequentibus diebus mediocris fui valetudinis usque ad 6. diem Septembris ac composui aliqua pia cantica ad Fridericum regem, ducem Johannem et ducem Adolphum.