Tekstbase - kontekst

15. Julii locutus sum cum socero Jurgen Rosenkrantz, cui gratias egimus, quod elocaverit sororem Catharinæ. Item breviter aperui ei meam conditiunculam ac tradidi ei ἐκθειαστικὸν canticum, quod promisit se regi traditurum. Item locutus sum Jürgen Luck.

19. Julii ancilla C. A. extincta est peste.

28. Julii cepit Catharina, uxor Clawes Anckessen peste ægrotare. 29. Julii mortua est filia C. A. Ingeborch. Eodem convivarunt sacerdotes in Starp splendide, ubi Johan Strömessen insanire pergebat.

30. Julii Ingeborch funus sepultum; noctu vigilavimus.

31. Julii funus Hans filii C. A. sepultum est, post meridiem Marin Oluffs.

1. Augusti Boel infantuli C. A. funus est sepultum.

2. Augusti ancilla Karin sepulta est.

3. Augusti locutus sum in arce Koldingica ducissæ Luneburgicæ Dorotheæ, cui tradidi paræneticum canticum, ac virgini nomine Engel tradidi ἐγκωμιαστικὸν regis Christiani.

4. Augusti in arce Koldingica narravit mihi doctor Cornelius, quod regina dixerit me non satis mentis compotem esse. Ita mei obtrectatores maledici exponunt me contumeliis propter morbum hypocondrion, quem una cum tentationibus spiritualibus ex voluntate et permissione Dei perpessus sum, unde Deus me optime liberavit. O Deus, vide et judica malevolorum insidias et ex his opprobriis me protinus eruito! Amen.

5. Augusti Clauesken, filius C. A., peste extinctus sepeliebatur.

15. Augusti coepit ægrotare peste filiola mea Elzabe. 10. Augusti ulcus pestilens incruduit et quatriduo graviter laboravit; ego cum lachrymis ardentem precationem meam pro ea ad Deum institui, ut illam superstitem servaret, ex qua bonam familiam et multas animas ad vitam æternam colligeret atque crearet, deinde ad superandam invidiam et foerociam inimicorum meorum.

21. Augusti locutus sum Marco chirurgo, ut suam operam in hoc periculo navaret, et promisi ei dalerum pro labore suo in convalescentem.

22. Augusti frustum ex ulcere extraxit chirurgus.